السلام عليكم ورحمة الله 
الحلوى لي رح تشوفو معايا اليوم أنا شخصيا أول مرة نجربها عجبتني بزاف في شكلها لأنها بريزونتابل تحمرلك وجهك 
تصلح للاعياد وللسهرات الرمضانية وتقدري تحتفظي بيها لمدة لاباس بيها للضيوف الغفلة هكا تكوني ديما واجدة وعندك وش تحطيلهم 
مقاديرها في المتناول ومتوفرة في كل بيت وهي
-كاس فرينة
-كأس حليب دافيء
-حبة بيض
-رشة ملح
-ملعقة صغيرة خميرة كميائية
وأكيد لازملك المول الخاص بهذ الحلوى تلقايه فالاسواق باشكال مختلفة انا خيرت الشكل الموضح في الصورة
التحضير
تحطي المقادير مع بعض ثم تخلطيهم بالميكسور حتى تتحصلي على عجينة تشبه عجينة الغرايف ولي كراب يعني العجينة متكونش جارية ولا خاثرة …….لما تتجانس العجينة تعك غطيها بكيس بلاستيكي لمدة 15 دقيقة بش تتخمر كما فالصورة
لما يتخمر الخليط في مقلات ضعي الزيت خليه يسخن وجيبي المول تعك اغطسيه في هذا الزيت توقفيه بشكل عمودي ومتخليهش يغطس كلو غطسيه الى النصف فقط (كي نقول النصف منقصدش هذاك المقبض ولكن منتصف الوردة لي فالقاعدة 
) للأسف مقدرتش نصور هذ المرحلة كنت وحدي فالمطبخ مصلحتش نكون منشطة للحصة ومخرجة في نفس الوقت هعهع 
المهم المول خليه يسخن جيدا بش متتلصقلكش العجينة فيه والعجينة ايضا خليها تتخمر بش تعطيك نتيجة مليحة….المهم لما تحسي المول تعك سخن خرجيه من الزيت وغطسيه تاني فالعجينة الى النصف كما درتيلو فالزيت ومن تم حطيه فالزيت يتقلى بنفس الطريقة ردي بالك تخليه يعوم دااائما يكون للنص بش
متصادفيش هذ الحالة 
كي تفوتيها لمصلحة الاستعجالات وتخلي العجينة ترتاح والمول يكون سخون رح تكون نتيجة مرضية كما هذي
وهذي
كي طيب حاولي تنحي الوردة برفق من الطابع وهي سخونة تكوني حضرتي الشربات عسليها ولصقي كل زوج مع بعضاهم ولا خلي كل وحدة وحدها حسب الرغبة وقدميها مع الشاي
هذا الشكل النهائي
ان شاء الله يكون الشرح واضح …..وبصحتكم
راح نجربها ان شاء الله وإذا لقيت مشكل راح نسقسيك اوكي ؟؟
|
المشاركة الأصلية كتبت بواسطة iraـــــــــam
 وااااااااااااو تبان ساهله وخفيفه
راح نجربها ان شاء الله وإذا لقيت مشكل راح نسقسيك اوكي ؟؟ |
اوكي من عينيا عزيزتي راني فالخدمة انشاء الله تنجحلك
ان شاء الله يحصل لنا الشرف بتذوقها
ان شاء الله يحصل لنا الشرف بتذوقها[/QUOTE
هيا مد يدك باسم الله راك قريب منا فالعيد اضرب دورة 
يعطيك الصحة
