السلام عليكم ورحمة الله
واليوم رجعتلكم من جديدة مع حلوى اسمها الجوزة طبعا تسميتها لانو شكلها كحبة الجوز
وهي شكل وذوق ولا اروع
كل سقساو عليها
المهم المقادير
250 غ زبدة
100غ سكر غلالاص
3 بيض
كاس نشاء
ملعقة صغيرة خميرة
الفرينة عند يدك
للحشو حليب مركز محلى 
طريقة التحضير
في وعاء تحطي الزبدة تكون بدرجة حرارة الغرفة يعني مهيش ذائبة تزيديلها السكر وطلعيها مليح بالروبو حتى تولي كريمة
بعدها تبداي تضيفي البيض حبة حبة يعني حبة وتخلطي مليح وتزيدي التانية وهكا حتى تخلصيهم
تكملي تخلطيهم ملييييييييييييييييييح
بعدها تضيفي كاس النشا
بعدها مغرف الخميرة
ودرك تنحي الباتور انتهت مهمة تاعو
وتبداي بيديك وتضيفي الفرينة شويا شويا
حتى تتحصلي على عجينة متماسكة ومليحة في يدك تحطيها في بابيي فيلم وتخليها ترتاح 
وهداي طابع الجوزة والطياب يكون فوق الطابونة على نار هادئة
تكوري العجينة كويرات صغيرة
وتحطي كل وحدة مكانها 
بعدها تردي الغطاء وتضغطي عليه
وتحطيها طيب على نار هادئة ومرة على مرة ارفعي الغطاء بشويا وشفي كي تلقاي لونها دهبي نحيها
كيما هديا تنحيلها الزوائد وتنحيها وتحطيها جانبا
بعدها تجيبي نستلي طايبة
وتحشي بيها كل وحدة وتحطيهم فوق بعضاهم
وتحطي بيناتهم شوكولا
وهداي شكلها النهائي وبصحتكم
وبصحتكم
والف هنا وشفااء
الشيف الغزالة
