ساعات يبدى خاطري واجعني *** و ساعات يبدى خاطري نشوان
وساعات نزهى و الهوى يطاوعني *** و ساعات نبكي و الدموع تبان
وساعات نجوع مسلان ما يشبعني *** و ساعات نبدى من الهوى شبعان
وساعات الدنيا تحب تعكسني *** وساعات تزهى أيامي نولي فرحان
وساعات يحب الشيطان يوسوسلي *** لكن نرجع وانحصّن نفسي بالقرآن
آنا خوك المربي حبيتك تسمعني *** اسمع كلامي وكل كلمة عندها ميزان
وعندي تجربة في الحياة بحكم سنّي *** والتجربة هي اللي تصنع الإنسان
وهذا مبدأ في الحياة خوذه عني *** وإذا طبقته تعيش ديما مطمان
لا ندخّل إيدي للمغاغر لا اللفعة تلسعني *** ولا ندخل ديار مالوراء وما ندخل كان مالبيبان
و ديما صاين لساني وضميري يحاسبني *** لقيت روحي عايش أحلى من عيشة السلطان
وان شالله ربي القادر بشفاعته يمتعني *** وفي النهاية يكرمني ندخل جنة الرضوان
